الراوي الشاعر / سبيتان بن سويلم المنصور الشراري

الشاعر و الراوية أبو ضيف الله سبيتان بن سويلم المنصور- حفظه الله – من شعراء المفالحة من الفليحان من الشرارات , له باع كبير في الشعر ويحفظ الكثير من أخبار القبيلة وتاريخها , وهو ممن عاصر جيلين جيل البداوة على حقيقتها وجيل التمدن والتحضر فهو من المخضرمين – أطال الله بعمره على طاعته سبحانه – ومن قصائد أبو ضيف الله القديمة قصيدته المؤثرة في ميقوع عندما مر ميقوع ورأى بداية سفلتة الطريق الحالي الذي يمر من وسطها فتذكر أيامها الخالية وأيامها الحالية وكيف تبدلت وتغيرت فقال هذه القصيدة :

يا عد يا للي مداهيلك سهجن = مستبشرن بالشين عدة عوامي
وين الظعون اللي للمنازل تدانن = بارباع شغل اليدين الهمامي
اللي على الجيهات نشرن وبنين = وظفن على الطعسين لون الظلامي
عينت جلسات(ن) على الهيل والبن = لذربين الايمن والمين اللغامي
يا عز مضيوم(ن) من مصيبات ومحن = عجلين بتلباة الطلب له شمامي
عاشق وعماش قبل التفطن = حلالة المشكل نهار الزحامي
وماطل راع الغافلة وان تلاقن = بحمر النواظر للمعادي سطامي
واخو شحيرة عزهن وان تردن = اللي على ساقة خويه يحامي
وبشير اللي فعوله يعدن = وين أخو فزة عزيز المقامي
واخوه البياع للمتن الايمن = إليا غشى صم القلوب الغمامي
والهمش والخيال ما بها تكنكن = نطاحة الصابور والبزر حامي
مسند وحمدان ما بمدحهم ظن = و لا هي مهمونة بالرجال العدامي
وابو وضيح اللي مديحه موثن = إن صابت الرهيبا خطاة الخمامي
واخو عصيدة ريفهن يوم يلفن = ريف الهجافا يوم قل الطعامي
وين الرعايا اللي على جمامك تقافن = مرحوم يا مدهال عبس الجهامي
هذي صدير(ن) وذوليك وردن = وهذي على المعطان وهذي حيامي
وهذي ترازم وذولي يحنن = خلجن ضيعن عيالهن بالعسامي
كم خفرة(ن) نسيت حياها إليا جن = فلن ذوايبها وطاح اللثامي
هذي تعديهن وذولي يردن = مستالشة من طردها للظوامي
وهذي مداهيل الجهام الملوّن = إن أخصبت عقب السحاب الردامي
حلو(ن) لبنهن للحشا ما يثمن = ما كيل بالميزان على الغرامي
تلقى بمداهيله حياض(ن) يملن = ان زيد من زين الحليب الطعامي
واليوم يا ميقوع لونك تشين= ما فات من طربات راحت حلامي
أرسى الرواسي من شفا البير حدرن = دارت بهن الدنيا وصارن هدامي
وسبحان من خلى منازلك يخلن = مفصل الدنيا على ما يرامي
وتبدلوا عن ماك الانهار يجرن = بوادي السرحان نبع الجمامي
ترجف مكاينها على أبراج يرشن = قمح نباته على الحزم زامي
تصفط تريلاته على سيده يعبن = صوامع(ن) للقمح طول الخيامي
نسرح ونمرح بالجزيرة بلا من = مروين حنا والخوارج مظامي
عبد العزيز اللي مداليه يردن = نشرب بحبله القراح الجمامي

وكما ترون القصيدة اشتملت على ذكر حال ميقوع قبل وبعد واشتملت على ذكر شخصيات هامة كان لها الدور الكبير في شأن رفعة القبيلة ثم يذكر الشاعر ما نعيش فيه من أمن وأمان منذ تولي الملك عبد العزيز بن عبد الرحمن آل سعود – رحمه الله تعالى – للحكم وإلى الآن في ظل هذه الحكومة الرشيدة حرسها الله وحفظها بحفظه .

جمع وإعداد وكتابة وتنسيق /
سويلم بن متروك بن غنيم الشراري ( أبوبكر )